Please select from the following:
അമല ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിലെ ട്രാൻസ്ഫ്യൂഷൻ മെഡിസിൻ & ഇമ്മ്യൂണോഹീമറ്റോളജി വിഭാഗം രക്തഘടകങ്ങളുടെ സംഭരണ സംവിധാനത്തിൽ ശ്രദ്ധേയമായ മുന്നേറ്റം കൈവരിച്ചു. Thermo Scientific കമ്പനിയുടെ 816 ലിറ്റർ വീതം ശേഷിയുള്ള രണ്ട് –80°C അൾട്രാ ലോ ടെമ്പറേച്ചർ (ULT) ഫ്രീസറുകൾ ബ്ലഡ് സെന്ററിൽ സ്ഥാപിച്ചത്. രക്തത്തിൽ നിന്ന് വേർതിരിച്ചെടുക്കുന്ന പ്ലാസ്മ ഘടകങ്ങൾ സുരക്ഷിതമായും ഗുണനിലവാരം നിലനിർത്തിയും ദീർഘകാലം സംഭരിക്കുന്നതിനാണ് പ്രധാനമായും ഈ ഫ്രീസറുകൾ ഉപയോഗിക്കുന്നത്. രണ്ട് ഫ്രീസറുകൾക്കുമായി 1,632 ലിറ്റർ സംയുക്ത സംഭരണശേഷി ലഭ്യമാകുന്നതോടെ, കൂടുതൽ അളവിൽ പ്ലാസ്മ ഘടകങ്ങൾ ശാസ്ത്രീയമായി സംഭരിക്കാനും ആവശ്യാനുസരണം രോഗികൾക്ക് ലഭ്യമാക്കാനും ബ്ലഡ് സെന്ററിന് സാധിക്കും.ഈ പുതിയ സംവിധാനം അമല ആശുപത്രിയിലെയും തൃശൂർ ജില്ലയിലെയും സമീപ പ്രദേശങ്ങളിലെയും രോഗികളുടെ വർധിച്ചുവരുന്ന രക്തഘടക ആവശ്യങ്ങൾ കൂടുതൽ കാര്യക്ഷമമായി നിറവേറ്റുന്നതിനും, രക്തഘടകങ്ങളുടെ ലഭ്യതയും ഗുണനിലവാരവും തുടർച്ചയായി ഉറപ്പാക്കുന്നതിനും സഹായകമാകും.ആധുനിക സാങ്കേതികവിദ്യയോടുകൂടിയ ഈ പുതിയ സൗകര്യം അമല ബ്ലഡ് സെന്ററിന്റെ രക്തഘടക ശേഖരണം, സംഭരണം, വിതരണ ശേഷി കൂടുതൽ ശക്തിപ്പെടുത്തുന്ന ഒരു സുപ്രധാന ചുവടുവയ്പ്പാണ്. ആശിർവാദ കർമം അമല ഡയറക്ടർ ഫാ. ജൂലിയസ് അറയ്ക്കൽ സി. എം. ഐ നിർവഹിച്ചു, ജോയിന്റ് ഡയറക്ടർ ഫാ. ഷിബു പുത്തൻപുരയ്ക്കൽ സി. എം. ഐ, ബ്ലഡ് സെന്റർ മേധാവി ഡോ. വിനു വിപിൻ എന്നിവർ പ്രസംഗിച്ചു.